Nastar

 Alhamdulillah masih diberi kesehatan, keberkahan, kekuatan dan masih banyak lagi dah yang Allah kasih buat aye...alhamdulillah...alhamdulillah ya Allah.

Ini hari ke 12 bulan Ramadhan, Masya Allah udaranye sejuk banget...terima kasih ya...Allah...😊

Lagi rada mager dikit ini, gegara bebikinan nastar permintaan suami kemarin...alesan aje padahal buat nyantai...🤣🤣🤣.

Ini kue emang legend banget dah, kudu ada di lebaran...tapi lebarannya masih lama Mak...😊...biarin dah klo suami yg minta jabanin dah apalagi udah disedian semua bumbunye...cuz lah...bikin.

Kagak banyak bikinnya sekilo doang...ini kite pake resep kampung yg kagak pake butter...maklum lideh kampung kagak bisa makan yg rada wangi...ngeles mode padahal karena harga butter yang kagak pas dikantong kite🤣🤣🤣.

Ini resep yang dipake biar kagak lupe mangkanye aye taro dimari...

NASTAR ala kite :

Bahan :

🌷. 1 kg tepung terigu serba guna disangrai pake daun pandan ampe daunnye kering.

🌷. 1 kg mentega curah kagak ada merknya pake plastik doangan, abang bojo yang beli jadi kagak boleh protes 😊. Sisain kira- kira 3 sendok makan buat olesan.

🌷. 150 gram gule kite blender.

🌷. Nanas 3 diparut masak ampe kering tambah gula pasir sekitar 100 gram kagak pake timbangan waktu numpleknya pokoknya beli ¼ kg buat selai ama campuran tepung.

🌷. Tepung maizena 4 sendok makan

🌷. Susu bubuk putih 2 sachet.

🌷. Telor kampung 10, 5 buat adonan yang 5 lagi buat olesan.

Cara :

💐. Campur mentega, gula halus mixer kurang lebih 10 menit terus telor kuningnye aje 5 biji cemplungin mixer lagi ampe rata.

💐. Terus cemplungin terigu, maizena, susu aduk pake tangan yang udah di cuci bersih.

Udeh gitu doangan, uplek dah buletin, bakar dan alhamdulillah kelar maghrib ♥️🤣🤣...maklum banyak dramanya.

Dan hasilnya Alhamdulillah...eundes kata abang bojo and the geng...bakalan ga nyampe lebaran ini mah...🤣🤣🤣.

Dinikmati aje...mo lanjut lagi bikin kelinca pesenan abang bojo lagi yang kangen makanan almarhum emak 😔.

In sya Allah nanti kite simpen dimari lagi resepnye biar kagak hilang...

Segitu dulu ya...cerite kite tentang nastar yang cuma tinggal setoples 🤣🤣🤣